庸醫用藥不對症 辣招七年淪笑柄

古人教落,知病之所起,方能治之。其實唔止醫病係咁,穩定樓市道理亦係一樣,好似港府咁,唔係從土地供應嘅根本問題上入手,而係頭痛醫腳,腳痛醫頭,一味迷信乜鬼辣招,結果咪本末倒置,搞到問題積重難返咯。
呢嗱,唔經唔覺,樓市辣招已經推出七年,結果係點,大家有目共睹,家陣連五百呎公屋都賣成五百萬元,早就脫離現實,連地產商都忍唔住揶揄港府「非常時期、非常措施」搞咗七年,市場嚴重扭曲,淨係益咗政府庫房,白白收咗幾百億元特別稅。呢嗱,政府呢頭收緊辣招規管「一約多夥」,嗰頭就有非本地買家斥近二億港元大手狂掃多個單位,你話辣招有冇用嘞。
今時今日樓價離譜到咩程度?有政黨調查發現,超過九成受訪者認為目前樓價過高,六成多人希望樓價可以掉頭向下,最有趣嘅係,擁有一個或以上私人物業嘅受訪者,希望樓價回落嘅比率同樣高達四成多。好簡單啫,唔少單頭業主物業都係用嚟自住,無論樓價升幾多都好,對佢哋嚟講都隻係紙上財富,反而仔女長大需要成家立室,梗係望樓價適度下調喇。
唔知係攞景定贈興,財政司司長陳茂波話喎,美國利率正常化速度加快,一九年前仍有多次機會加息,香港喺聯匯製度下冇可能長期唔跟隨,相信樓市未來必有調整。冇錯,樓價冇可能永無止境上升,問題係港產官僚淨係識出口術,次次狼來了,市民今日唔上車,第時恨錯難返,你話到時追瘦波叔好吖,定抑或聽佢老哥講,疊埋心水執定包袱返珠西退休安老好呢?
好明顯,港府淨係出辣招壓抑需求,始終唔係辦法,點講都好,住屋係剛性需求,市民買唔起「正常樓」又唔想捱貴租畀人撳住搶,惟有退而求其次,連逼仄過車位嘅納米盤都照殺,業界人士指摘辣招扭曲市場,咪就係咁解囉。
講嚟講去,想樓市健康發展,始終離唔開覓地建屋增加供應,而香港荒謬就荒謬在呢度,一邊係無殼蝸牛望樓興嘆,另一邊係大量土地閒置養蚊。鬼咩,無論係發展棕地抑或鄉郊地帶,弱雞港府根本擺唔平既得利益人士同埋環保團體;想話發展郊野公園又或者填海造地?你估你係強政勵治嘅新加坡政府吖?覓地無能咯喎,港府惟有望天打卦,期望外圍環境轉變令樓市自動調整,再唔係推出印花稅辣招呢類花拳繡腿,當交咗功課塞住市民把口。
無符喇,港府一日冇辦法增加土地供應,樓市問題始終都係死症,莫講話「女媧」上場搞唔掂,就算上帝下凡都係無力回天嘅咋!
原文地址:http://orientaldaily.on.cc/cnt/news/20170425/00190_001.html